ZOMI INNKUAN GERMANY THUKHUNTE

§ 1. Min leh Phungpi Mun

1. Ki pawlna min Zomi Innkuan Germany hi-a, kumpi zum ten hong sang ciangin Zomi Innkuan Germany e.V. kici ding hi. Atom-in ( ZIG ) ki zang ding hi.
2. Kipawlna´phungpi mun pen Frankfurt am Main a hi hi.

§ 2. ZIG Ngimna leh Tupna te

1. Leitung mun tuamtuam aa om Zomite tawh ki kum khawm in, Zogam-Zomi khantoh na ding leh Zongeina kepcing zawh naang ngimna kinei hi. ZIG pen Politic tawh ki sai vai hawmna tawh aki bawl hilo aa, Biakna lam tawh kisai deidan na ahizong atuam aa pawlpih na omlo hi.
2. Zogam aa om acimawh Zomite huhzawh ding leh et zawh ding.
3. Zomibup ki-ittna leh kilemna a om naang vaihawm ding.
4. Hih ki pawlna pen khat le khat ki huh nang hi aa, sumle pai zon-nang ngimna om lo hi.

§ 3. Pawlmi suahna

1. Pawlmi khat pen Germany gam sungah aom khat hi ding aa, kipawlna ii deihna leh ngimna teng zuihzawh ding kuul hi. Tuamahbangin pawlsungah kuamah ki deidanna omlo in thuneihna zong akikim in om hi.
2. Hih ki pawlna sungah Zomi akua mah peuh luut thei aa, pawl sung ah Zomi kum 18 acingsa mikhat ahih naak leh suakta takin luut thei hi. Pawlluutna lai sungah amin aki khum kuul aa, tuabanah kipawlna ii thukhun te a thukimna te thei-in azuih zawh ding ciangin pawlmi suak theih pan hi.
3. Alungluut Zomi ahilo midang te zong luutthei aa, ahihzong'n Panmunlen teng ki thukimna tawh ki khensat ding hi.

§ 4. Pawlmi pan pusuahna;

1. Hih ZIG pawl sung pan pusuak nuam aom leh pusuak thei aa, ahizongin a pusuahnop na athu genkhiat ding leh kha-2 peuhmah EC te tung zaaksak kholh kuul hi. Tua mi-in akhiatsa pawlsum teng ngah kiik lo ding hi.

1. Pawlmi khat a sih teh pawlsung pan apusuak in ki ciamteh pah ding hi.
2. Kumcin dongin ki pawlna sum apia lo aom leh EC makai te thukim na tawh member sungpan ki pu suaksak thei hi.

§ 5. Pawlsum ki don dan ding

1. Pawlsum zonna ding in kumkhatin-4 vei pawlmi khat tek tung ah sumdonna kinei ding hi.
2. Hih pawlsumdon pen January,2008 pan kipan ding hi. ZIG pawlsum zondan dingzong 06.01.2008 ni aa hih anuai aa kikupnate kikip sak suak hi, a) Nasep neinai lote (Single- Family) kha 3 teh 5-€ dong ding.
3. b)Mikhat (Single) ciang khakhat 5-€, kha 3 teh 15-€ dong ding.
4. c)Innkuankhat ciang khakhat 10-€, kha 3 teh 30-€ dong ding.

§ 6. Ki pawlna sung ah ki khual dan ding

1. Germany aa om Zomi teng nopna- dahna ah kikhual theih nangin, zato lumte vehna, nausuakte nauetna leh pawlmi asite sihgaalna ki nei ding hi. ZIG Mipibup thukikupna sung aa atamzaw deihna tawh ciangtan bang hi ding hi.

• a) Zato ni 4 pan atung siah alumte Pawlmin tawh 50-€ aa veh ding.
• b) Nausuakte nauetna 25-€ pia ding.
• c) Pawlmi khatin deihloh pen-in sihna atuah leh pawlmin tawh 300-€ aa gaal ding

§ 7. Pawl Thudot te

1. ZIG ki pawlna sungah a Taltak zawdeuh teng Thudot dingin ki koih aa, Vai athupi mahmah khat peuh aom ciang Panmunlen ten kuppih ding leh dot theih ding in ki koih hi. Tua Thudotte kum 5 in khat vei athakin ki seh ki ding hi.

§ 8. Panmunlen (EC) sung leh ki tel dan ding

1. Panmunlen pawlmi (EC member) sungah•a) Pawl lutang- 1 leh 2

• b) Pawl Thusa- 1 leh 2
• c) Pawl Sumkem- 1 leh 2
• d) Pawlneihsa Encik

1. Panmunlen pawlmi suahtheih dan; Pawlmi ahih nakleh Panmunlen pawlmi suak thei aa, alunglut peuhpeuh Mipibup thuki kupna khawmpi ah hong ki tel thei hi. Tua kitel ding hun pen kitelna makaihpawl in hong thei khawlsak ding aa, kitelna makaihpawl ii hong makaihna tawh Mipi atamazaw thu kimna 3/4 kidongin ki tel ding hi. Panmunlen pawlmi khatvei aki tel khit leh atawmpen kum 2 sem ding aa, akik aa panmunleng thak te tawh aki laih ni hun dong ki pawlna sungah thu nei ding uh hi.
2. Panmunlen pawlmi-te sep ding leh sep theihna; Panmunlen pawlmi ten hih ki pawlna hong makaih ding hi. Zum vai atuamtuam ah atawmpen mi 2 pai khawm hamtang ding uh hi. Tua mi 2 sungah Pawllutang 1 ahih kei leh 2 in zuih kul hamtang hi. Panmunlen pawlmi te thukimna tawh ZIG Thukhun-te puah thei/ laih thei lo ding uh hi.

§ 9. Mipibup Khawmpi

1. Mipibup khawmpi pen Khuadopawi (October) bawlni hi ding aa, Khuadoni ma atawm pen kha-1 akisam in lai, e-mail tawh zong ki zasak ding hi.

Mipibup kikupna sungah,

◦ a) Kum khat sung aa sepkhiat, bawlkhiat nate leh mailam sep ding teng ki kum ding,

◦ b) Panmunlen pawlmi sung teelkiikna leh akisam aom leh puahphatna ki nei ding,

◦ c) Kum khat sung aa sum aluut leh zatkhiatnate aa kipan sum saziante pulak khiatnanei ding.

◦ d) Panmunlen sung aa aki sam atuamtuam ki kup na hun ding.

◦ e) Thukhun khel ding leh puah ding aom leh ki kup na. ◦ f) Ki pawlna phiatkhiat nopna aom leh ki kup na.

1. Tuaahihmanin mipibup khawmpi pan thukhensatna te pen atamzaw thu tawh hi ding hi. ZIG mipibup khawmpi pen ZIG aa dingin asaangpen / athunei pen a hihi.Hih khawmpi aa thu khensatnapen Mipi tawh ki sai hi, (Panmunlen ten a khen sat zawh loh thute zong mipibup khawmpi in khensat thei cih na hi.)
2. Mipibup thukikup ding pen sak leh khang kimuhkim theihnang hamsatna hang ahizongin, phone leh online te baih tak in omta ahih man in, tuate tawh ki kupna ah akihel te zong mipibup khawmpi sung ah akihel in kiciamteh ding hi.
3. Mipi tawh kisai thuki kupna khensatna pen khawmpi apai 3/4 thukimna tawh ki khensat ding hi.

§ 10. Thukhunte puahphatna

1. ZIG thukhunte puah phatna pen Mipibup ki muhna Khuado pawi ah ki kum khawm ding aa, hongpai teng lakpan 3/4 thukimna tawh puahphatna ki nei thei ding hi. Hihbang aa puahphat nopna aom ciangin Khuado pawi leh Khawmpi sapna lai sungah athu le la ki thei khol sak ding hi.
2. Thukhun puahna aom leh hongtheih pih Zum tuamtuam ah zong ki thei sakpah ding aa, ZIG pawlmi teng kiangah zong Lai tawh theihsak pah hamtang kul hi.

• 11. Neih leh Lam Kepcingna

1. ZIG min tawh aki nei Neih leh lam pen pawl Panmulen te'n kem ding hi.

§ 12. ZIG ki pawlna phiattheihna

1. ZIG kipawlna pen atawmpen a kipawl-lai mi-7 acin naak leh kiphiat theilo dingaa, mi-7 acin nawn loh ciangin kikupna bawl-in a omlai pawlmi 3/4 thukimna tawh kiphiat thei ding hi.
2. ZIG kipawlna aki phiat ciangin kipawlna neihsa ( van leh sum ) aom lai teng asumin kisuah dingaa, Zogam aa om tagah sang khat ahih kei leh mipi aa ding nasep kipawlna (kumpi lam ahilo) khatah ki pia ding hi.

Hih atung aa thukhun tengpen Thukhun kikup ni aa hongpai ZIG pawlmi atamzaw thukimna tawh 02.03.08 ni-in ki kupna tawh kipsakna ki nei hi.

*****************************************************************

Nimit: 02.03.2008

Amun: Frankfurt am Main